Pages

Sunday, August 3, 2014

KTP leh Incheina

KTP LEH INCHEINA

((Fashion and Youth Ministries in Mizo Dialect))

KTP leh incheina hi thil pahnih inkawp tlat a ni. Nalh tum em em kan nih loh pawh in, tumah nalh loh tuma inkhawm kan awm ngailo. Thinlung chiah entu Pathian fak mah ila, he khualzinna ramah hi zawng lang thei atanga min tehtu mihringte zinga rawngbawltu kan ni tlat.

Hmanlai atang tawh khan han tih lemah, ka hriat theih chin vel atang khan incheina hian buaipui a hlawh em em mai a. Sikulah te, hnathawhnaah nen, sakhuana lah a bang chuang lo, inkhelhnaah te hak bik tur awmin, party-na leh meeting-naah te mitin buaipui niin ka hria. Thla tin chu sawi loh, nitin incheina a sum hman ral hi zawlkhawpui Aizawl chhungah chauh pawh hian, dawrkaite kawmna vel atang chuan, a mak a maka tamin cheng nuai sawm (Rs. 100000) chu a chuang zan ang tih ngam a ni. Nuai nuai mai ana, kan va buiapui tehlul em! Mit rawngbawlna nghawng ani ngei ang.

Tumah hi incheina hian min kal kan lo chu anih hi. Incheina laka kawngka thisen a tat kan awm lo ni berin alang. Sunday sikul department bul ber Beginner, kohhran then khat phei chuan pre-Sunday sikulte pawh an nei a, heng department-a awmte atang tawh hian incheina hian kan nunah hmun a luah tan der tawh a ni. A pui a pang, a fel a nawi, a ngo a hang leh tawk chiahte, tin, a fing a a te nun heti khawpa khawih thei thil hi KTP vei awm reng ani, nun a khawih tlat, thalaite nun ngei chu a khawih nat ber ani si.

Minawlpuiin kan hriatthiam danin incheina, saptawng taka fashion hi thawmhnaw sawi nan kan hmang a, a dik reng a ni. Amaherawh chu, chhui zau deuhte chuan fashion/incheina huang hi an zauh thui khawp mai. Pheikhawk, kekawr, kawr leh tlereuh bakah hian motor (cars), mobile phones leh electronic bungruate (gadgets), kan mizia leh chetziate, mimal nun hmasawnna te (personality development), kan tawng dan leh thumal hman thin te (soft skills) leh thildang midangin a min teh theihna ang chi hi incheina huangchhungah an telh vek ani. Aw Kristian thalai, fimkhurna tur i va ngah ve le. Ti tawp lovin, ngaihtuah hmasa zawk thin ang che.

Chutih laiin, hmun dangah pawh tih ngam awm loh tak, Biak In tuallai chu sawi loh, a chhungah ngei mai kan member, tleirawl nulaten pawnfen chhing lutuk, eng titi in nge a pawh chhoh mai dan pawh physics thiam deuh tan lo chuan chhutchhuah theih pawh ni awm lo tak, pan bawk si kekawrte rawng pawh hriat theih thawthang, an zawna thut inthlahrun awm khawp ang chite an hak tak hi. Mipa lahin kan hak tawk aia size thum vela te ni awm tak, kap chhing em em maite inkhawmnaah kan ha ta. A va mak em, tunlai zipper that zia hi!

Zoram thalai zinga Kristian pawl lian ber KTP hi incheina lamah hian kan va uchuak ta ve ti thei erawh kan ni em mawni le? Heng kan memberpuite hi an tam lo asin, mimal taka fuih tham lek anni. Kum sawm pali chin chuan thil tha ani lo tih kan hre vek asin, heng mite, uchuak bikte hi pulpit ropui atanga member zawng zawng nihna anga sawi lovin i vei ngam anih chuan pan ngam rawh. I pan ngam lo anih chuan Pathianin midang vei tir mawlh rawh se. I pan ngam anih chuan, i thu hman leh i hawiherah fimkhur ang che. I tih takzetna leh i thahnem ngaihna chu chung hmang chuan an lo teh let dawn si che a.

Heng mite kan vei lai hian ngaihtuah chian tur kan nei. Tunlai khawvel buai tawh zia hi. Chanvo neih zante emaw Chawlhnite anih lem loh chuan inkhawm tura inthlak hman lo memberte zingah kan pung zel dawn. Hna atang emaw, zirna lam atangte, eizawnna dang khawi ilo atang pawh a haw tlai thinte, inkhawm hman loh hlauva chaw ei chu sawi loh, hmai phih tur pawh a inchhung lut hman lote tan hian an hak lai jeans, t-shirt leh sneakers te nen inkhawm nuam antih theihnan boruak siam thiamte hi a hun tawh lo maw? Hruaitu nihna chelhte tan pawh savun pheikhawk tle tak bun kher lova inkhawm ngam a hun ve tawh. Inchei up a pisa pan kan duh lo anih chuan, KTP fashion/incheina ngaih pawimawh luattuk vanga hna dah pending hi Kristiante tih tur niin alang lo.

College kallaite leh nitina in hlawhten an sum tlemte bakah an nu leh pate sum dil belhin nitin thawmhnaw (casuals) mawihnai ve deuh man an nei thei tawka, KTP-in incheina bik tur ang deuh kan sermon khum reng ang han lei lehna tur ngaihtuah ai chuan inkhawm loh mai thlang ta hi engzat tak awm ang maw? Tin, smart emaw formal taka hun chep bawk si, chaw ei puar mutchhuak kara inchei ai chuan EPL emaw UFC en mai thlang ta te pawh kan awm ang. Incheina, smart taka incheina kan ngaihsan vang hian thlarau engzatin nge hremhmun pan tawh ang a, engzatin nge pan mek ang le?

Kan hmeichhiate pawh tunlai chuan pisa lamah formal pants nen mawihnai leh zahawm takin an kal thin a, inkhawmnaa an hak erawhin hremhmun panna kawng an zawh emaw kan tih sak leh si. Kan sawi thin, hnam mila thil tih (contextualization) pawh chu nise, bikini culture chu ni lo mah ila, tuipui kam kan hlat em, nihna chhan tur kan nei lo, kekawr culture chu kan ni tawh asin le. Bih emaw fen aiin hak hi a him zawk bawk nen. Hriatthiamnain a hrethiam mawlh lo.

Isua min zirtirna Baibula kan hmuh theih chinah hi chuan han ngaihbel tur pawhin thawmhnaw lam sawina hi hmuh tur a vang ngei mai. Aw Lal Isua ang turin, thlarau leh tihtakzetin, thutakin Pathian hi chibai buk a tawk reng si. Chung mi chu kan awm em KTP member zingah hian? Zawn anni si.

“Miten min chhiar, min thlir reng e” I ngai pawimawh ang u.

“Pathianin thinlung chauh a en” I ngai pawimawh lehzual ang u.